منى زكى: غبت 4 سنين عن السينما وفيلم «الصندوق الأسود» هيتعرض يوم 28 أكتوبر
أمنية عبدالعال
قالت النجمة منى زكى، أنا اتخضيت لما اكتشفت إن بقالى 4 سنين بعيدة عن السينما، ومش مصدقة، أنا كان واحشنى شغلى أوى فى السينما، وطول الوقت كنت بدور على حاجة كويسة أشتغلها، وأهو الحمد لله راجعة بالصندوق الأسود.
وأضافت خلال مداخلة هاتفية فى برنامج "كلمة أخيرة" تقديم الإعلامية لميس الحديدى المذاع على قناة ON، أعتقد أن صعوبة الفيلم فى أن معظمه معتمد على التلقائية، ومحمود كامل كان بيشجعنا نكون تلقائيين حتى فى حركة الكاميرا عشان فيه عنف، فكان لازم كل حاجة تكون تلقائية.
وتابعت: إحنا صورنا وخلصنا الفيلم من قبل ما "الكورونا" تظهر فى العالم كله، والفيلم هيتعرض يوم 28 من الشهر ده، ويا رب يعجب الناس، ويكون حاجة كويسة، وأنا مبسوطة جدا بالتعامل مع محمد فراج ومصطفى خاطر، وهما هايلين جدا؛ لأن لما بيكون معاكى أشخاص موهوبة بيطلع العمل بشكل كويس جدا.
واستكملت: وقت الكورونا كنا بنصور مسلسل "تقاطع طرق"، وملحقناش نعرض فى رمضان؛ لأن كان عندنا ممثلين بره مصر، ولازم ييجوا مصر ومكنش فى طيران، وبالتالى مقدرناش نكمل، فقعدت نص أزمة كورونا بشتغل والنص التانى قافلة على نفسى.
وكانت الشركة المتحدة للخدمات الإعلامية، قد أعلنت عن تعاقد قناة ON العامة، برئاسة ألبرت شفيق، مع الإعلامية لميس الحديدى، لتعود ببرنامج جديد باسم "كلمة أخيرة مع لميس الحديدى"، وذلك بعد غياب عامين عن الشاشات المصرية، ويذاع من السبت إلى الثلاثاء، فى تمام الساعة التاسعة مساءً.